Lög Félags íslenskra húseigenda í Búlgaríu.

1 gr.

Félagið heitir Félag íslenskra húseigenda í Búlgaríu (FÍHB). Heimili þess og varnarþing er í Hveragerði.

2 gr.

Tilgangur félagsins er að vinna að sameiginlegum hagsmuna- og áhugamálum íslenskra húseigenda í Búlgaríu, efla samheldni þeirra, stuðla að reglubundnum og sem hagstæðustu ferðum milli Íslands og Búlgaríu og koma fram fyrir hönd félagsmanna í samningum.

3 gr.

Félagsmenn geta þeir orðið sem eiga eða hyggjast eignast húsnæði í Búlgaríu. Stjórnin skal halda skrá yfir félaga og fasteignir.

4 gr.

Stjórn félagsins skipa fimm menn og tveir til vara. Formaður skal kosinn beinni kosningu, að öðru leyti skiptir stjórnin með sér verkum.

5 gr.

Aðalfundur félagsins skal haldinn í febrúarmánuði ár hvert og skal boðaður með minnst sjö daga fyrirvara. Á aðalfundi skulu mál tekinn fyrir og rædd í eftirfarandi röð.

1. Skýrsla stjórnar

2. Endurskoðaðir reikningar

3. Kosning stjórnar

4. Kosning eins endurskoðanda

5. Félagsgjöldin ákveðin

6. Önnur mál

Aðalfundur er lögmætur sé löglega til hans boðað og hann sækja 10% félagsmanna eða umboðsmenn þeirra. Atkvæðis- og kosningarréttur á aðalfundi er bundinn aðild að félaginu þ.e. eitt atkvæði fyrir hvern félagsmann. Einfaldur meirihluti ræður úrslitum mála annarra en lagabreytinga.

6 gr.

Lagabreytingar fara aðeins fram á aðalfundi og skulu þær hafa verið boðaðar á dagskrá fundarins.  Þær þurfa því að hafa borist stjórn tímanlega fyrir boðun aðalfundar.

Lagabreytingar þurfa 2/3 hluta greiddra atkvæða til að öðlast gildi.

7 gr.

Félagsgjöld fyrir hverja fasteign, sem inniheldur félagsgjald fyrir einstakling.

8 gr.

Aukafund skal boða svo oft sem þurfa þykir. Um boðun, lögmæti og atkvæðisrétt gilda sömu reglur og um aðalfund.

9 gr.

Berist stjórn félagsins skrifleg tillaga frá minnst 10% félagsmanna um að félaginu verði slitið ber stjórninni að boða til sérstaks fundar um tillöguna innan tveggja mánaða frá móttöku tillögunnar. Skal boðað til slíks fundar með sama hætti og til aðalfundar félagsins og skal tillagan fylgja fundarboði. Um lögmæti fundarins og ályktunarbærni fer sem mælt er fyrir um í 2. mgr. 5. gr. félagslaga.

Á fundinum skal slík tillaga sæta meðferð eins og tillaga um lagabreytingu í félaginu, sbr. 6. gr. félagslaga. Til samþykktar á slíkri tillögu þarf 2/3 hluta greiddra atkvæða. Sé slík félagsslitatillaga samþykkt skal fara með skiptin að hætti laga nr. 20/1991, um skipti á dánarbúum o.fl., eftir því sem við á, einkum XV. kafla laganna. Félagsfundur sem samþykkir með lögmætum hætti að félaginu skuli slitið skal jafnframt ákveða hvernig þeim eignum félagsins skuli ráðstafað, sem eftir kunna að standa þegar gerðar hafa verið upp allar skuldir félagsins og kostnaður við skiptin. Félagsmenn eiga ekki tilkall til eigna félagsins við slit.